«Գում»-ի շուկայի հարակից տարածքից ձերբակալված մսավաճառները մինչև այս պահը շարունակում են մնալ անազատության մեջ. NEWS.am–ի հետ զրույցում այս մասին հայտնել է մսավաճառներից մեկը՝ նշելով, որ ձերբակալվածների հետ կապ չկա, այլ տեղեկություն այս պահի դրությամբ չունեն։ Հարցին, թե ի՞նչ են պատրաստվում անել վաղը, արդյո՞ք ամեն օրվա նման իրենց ապրանքը շուկա են տանելու, մսավաճառը պատասխանել է. «Այո, տեսնենք՝ կրկին անակնկալ շրջայցի կգա՞ն»: Հիշեցնենք, որ այսօր վաղ առավոտյան Երեւանի «Գում»–ի շուկայի հարակից տարածքից ՍԱՏՄ ներկայացուցիչները կարմիրբերետավորների հետ առգրավում են մսավաճառների միսը, լարված իրավիճակ էր ստեղծվել: Քաշքշոց էր սկսվել ոստիկանների եւ մսավաճառների միջեւ: Մսավաճառներից մեկը հանել էր կրակայրիչը եւ ուզում էր վառել իրեն: Քաշքշոցի ժամանակ մսավաճառներից մեկի ինքնազգացողությունը վատացել էր: Ոստիկանները բերման են ենթարկել 7 հոգու եւ ինքնահրկիզման փորձ կատարողին՝ խուլիգանության կասկածանքով: