Այսօր՝ դեկտեմբերի 29-ին, մերկասառույցի և մառախուղի պատճառով շղթայական ավտովթարներ և մահվան ելքով վրաերթ է տեղի ունեցել Արարատի մարզում։ Ժամը 08։00-ի սահմանում Երևան-Երասխ ավտոճանապարհի Մասիս-Մարմարաշեն մոտ 2-3 կիլոմետրանոց հատվածում բախվել են 100-ից ավելի տրանսպորտային միջոցներ։ Ինչպես հայտնում է shamshyan.com-ը, դրա հետևանքով առաջացել էր արհեստական խցանում. դեպքի վայր են ժամանել պարեկները: Տեղում պարզվել է, որ 2 հոգի վրաերթի է ենթարկվել այդ հատվածում, նրանցից մեկը տեղում մահացել է։ Դեպքի վայր են ժամանել նաև ոստիկանները, քննիչները և ՀՀ ՆԳՆ փրկարար ծառայության Մասիսի հրշեջ-փրկարարական ջոկատից 1 մարտական հաշվարկ։ Մահվան ելքով վրաերթի փաստով Մասիսի քննչական բաժնում նախաձեռնվել է քրեական վարույթ, իսկ շղթայական ավտովթարների փաստով ՊԾ Արարատի մարզի գումարտակում փաստաթղթեր են ձևակերպվում, որտեղ էլ պարզվում են վարորդների ինքնությունը։ Մասիսի քննչական բաժնում էլ պարզվում են մահացածի, վրաերթ կատարած վարորդի ինքնությունը և ինչ մակնիշի ավտոմեքենայով է տեղի ունեցել վրաերթը։