Ստրասբուրգում ԵԽԽՎ ձմեռային նստաշրջանում ընդունվել է բանաձեւ, որով մտահոգիչ է համարվել մի շարք երկրներում, այդ թվում՝ Ադրբեջանում եւ Վրաստանում ժողովրդավարական հետընթացը եւ մարդու իրավունքների խախտումները: Վեհաժողովը «լուրջ մտահոգված է Ադրբեջանում ժողովրդավարության, օրենքի գերակայության եւ մարդու իրավունքների հետագա վատթարացմամբ, մասնավորապես՝ շարունակվող բռնաճնշումները քաղաքական ու քաղաքացիական ակտիվիստների, լրատվամիջոցների ներկայացուցիչների եւ իշխանության այլ քննադատների նկատմամբ»։ Բանաձեւը կոչ է անում իշխանություններին դադարեցնել հետապնդումները եւ անհապաղ ազատ արձակել բոլոր նրանց, ովքեր կալանավորված են քաղաքական դրդապատճառներով։ ԵԽԽՎ-ն կոչ է արել Ադրբեջանի իշխանություններին կառուցողական երկխոսություն սկսել Եվրոպայի խորհրդի մարմինների հետ բոլոր չլուծված հարցերի շուրջ։ Նշվել է նաեւ, որ ԵԽԽՎ-ն շարունակում է վերահսկել իրավիճակը Արցախի ղեկավարության եւ այլ ռազմագերիների հարցում՝ Ադրբեջանին կոչ անելով ազատ արձակել այդ մարդկանց։