Շատ ակտիվ մասնակցություն ենք սպասում, տրամադրությունս բարձր է,- Գյումրիի ավագանու ընտրություններում իր քաղաքացիական պարտքը կատարելուց առաջ լրագրողների հետ զրույցում ասել է «Իմ հզոր համայնք» կուսակցության կողմից առաջադրված քաղաքապետի թեկնածու Ռուբեն Մխիթարյանը: Նա քվեարկել է 31/64 ընտրատեղամասում: «Ես հայտարարել եմ ամենասկզբից, որ «Հայաթ փրոջեքթի» ռեսուրսը չեմ օգտագործելու, որովհետեւ ես չեմ ուզում առավելություն ստանամ երիտասարդների դաշտում, որն այսպես, թե այնպես ունեմ: Ես շատ ուրախ կլինեմ, որ երիտասարդները գան տեղամասեր, կոչ եմ անում հատկապես երիտասարդներին՝ անպայման գալ, մասնակցել, որովհետեւ էս քաղաքը կարիք ունի երիտասարդանալու: Իմ առաքելություններից մեկը ես պատկերացնում եմ հենց դա»,- ասել է նա: Հարցին՝ անցանկալի զարգացումներ սպասո՞ւմ է, նա պատասխանեց. «Օրը ցույց կտա»: Արդեն ընտրություն կատարելուց հետո Ռուբեն Մխիթարյանն ասել է, որ քվեարկել է հանուն հայկական, երիտասարդ, զարգացող, ավանդույթներով, արժեքներով լի, անցյալի հետ կռիվ չունեցող, ներկայում լուսավոր ապագան կերտող Գյումրիի: «Դեռեւս էական, մտահոգիչ բաներ չենք իմացել, ուղղակի տեղամասեր կան, որ կուտակումներն են շատ: Բազմաթիվ դիտորդներ կան, լրագրողներ կան, կարծում եմ՝ ամեն ինչ վերահսկողության տակ է»: Նա հայտարարել է, որ ոչ մի ընդդիմադիր թեկնածուի հետ ինքը քննարկում չի ունեցել ու, եթե քաղաքապետ չընտրվի, ավագանու իր մանդատը պահելու է. «Ամեն ինչ գյումրեցիների ձեռքում է, ոչ մի վարչական ռեսուրս չի կարողանալու դիմակայել, եթե մարդիկ տնից դուրս գան ու գան ընտրության: Բարձր մասնակցության դեպքում ոչ մի վարչական ռեսուրս»: