Բերման են ենթարկել ԱԺ նախկին պատգամավոր Ռուբեն Հակոբյանին։ Տեղեկությունը NEWS.am–ի հետ զրույցում հաստատել է պատգամավորի որդին՝ Երևանի ավագանու «Մայր Հայաստան» խմբակցության անդամ Սամվել Հակոբյանը։ «Այդ պահին տանը չեմ եղել, չգիտեմ՝ ինչ հիմանավորմամբ են բերման ենթարկել հորս։ Գիտեմ, որ ինչ–որ թուղթ են ներկայացրել»,– ասել է Սամվել Հակոբյանը։ Ավելի ուշ ՔԿ-ն հաղորդագրություն է տարածել՝ նշելով. ՀՀ քննչական կոմիտեի պետության, սահմնադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում իրականացվող քրեական վարույթով փաստական տվյալներ են ձեռք բերվել այն մասին, որ Ռ.Հ.-ն 2025 թվականի հուլիսի 1-ին զանգվածային լրատվության միջոցով՝ հարցազրույց տալու ընթացքում հնչեցրել է իշխանությունը զավթելուն ուղղված հրապարակային կոչ։ 2025 թվականի հուլիսի 18-ին քննիչի միջնորդության հիման վրա մինչատական քրեական վարույթի օրինականության նկատմամբ հսկողություն իրականցող դատախազի որոշմամբ Ռ.Հ.-ի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 422-րդ հոդվածի 2-րդ մասով։ Նույն օրը Ռ.Հ.-ն դատարան ներկայացվելու համար ձերբակալվել է: