Երեխաների տակդիրները հարևան երկրներում 2-3 անգամ ավելի էժան են. Հայաստանում մարդիկ ո՞նց շատ երեխա ունենան: Այս մասին ԱԺ արտահերթ նիստի ժամանակ ասել է ԱԺ պատգամավոր Գառնիկ Դանիելյանը: Նրա խոսքով՝ Առողջապահության նախարարությանը մի քանի անգամ առաջարկել են, որ պետությունը հոգա երեխա ունենալու խնդիր ունեցող ընտանիքների ծախսերը: Ասել են, որ լավ բան են առաջարկում, բայց այդ ուղղությամբ քայլեր չեն ձեռնարել: «Ընտանիքներ կան, որ ցանկանում են երեխա ունենալ՝ չեն կարողանում, որովհետև արհեստական բեղմնավորման համար ֆինանսը չի ներում: Պետությունը դա պետք է անվճար դարձնի, ծնելիության վրա պետք է առհասարակ փող չխնայենք»,- ասել է Դանիելյանը: Անդրադառնալով տակդիրների ու հիգիենայի պարագաների գներին՝ Դանիելյանը նշել է, որ Հայաստանի ու հարևան երկիր Վրաստանի միջև գնային տարբերություն կա: «Նամակներ եմ ստանում, որ երեխաների տակդիրները հարևան երկրներում 2-3 անգամ ավելի էժան են: Մենք պետք է ամեն ինչ անենք, որ թանկացումների պարագայում մարդը շահագրգրված լինի երեխա ունենալու. առաջին անհրաժեշտության հիգիենայի պարագաների գների հարցը պետք է լուծենք»,- եզրափակել է նա: