Եվրախորհրդարանի պատգամավորները Ադրբեջանում ապօրինաբար պահվող հայ պատանդներին ազատելու կոչ են արել, նրանք դատապարտել են 15 հայերի նկատմամբ Բաքվի դատարանի կայացրած շինծու վճիռները: Նշելով, թե Ադրբեջանի և Հայաստանի միջև խաղաղության և հաշտեցման ուղղությամբ «նշանակալի քայլեր են ձեռնարկվել», այս ընթացքում էլ Հայաստան է վերադարձվել 4 հայ գերի, կոչ են արել «զարգացնել դրական դինամիկան»։ «Հաշվի առնելով այս զարգացումները՝ կոչ ենք անում Ադրբեջանի իշխանություններին այսուհետ էլ զարգացնել դրական դինամիկան և ազատ արձակել բոլոր հայ կալանավորված անձանց»,- նշված է հայտարարության մեջ։ ԵԽ պատգամավորները նշել են, թե նրանց ազատ արձակումը «կլինի բարի կամքի նշանակալի դրսևորում և ևս մեկ կարևոր քայլ՝ Հարավային Կովկասում երկարատև խաղաղության հաստատման ուղղությամբ»։