Սուրբ Աննա եկեղեցու միջադեպի գործով ձերբակալված Միքայել Մինասյանը դուրս եկավ քննչական վարչությունից. նրա նկատմամբ խափանման միջոց է ընտրվել բացակայելու արգելքը: Այս մասին հայտնել է փաստաբանը: «Միքայելը այս պահին ձերբակալումից ազատ է արձակվել, բայց դեռևս ունի մեղադրյալի կարգավիճակ: Խափանման միջոցն այժմ բացակայելու արգելքն է: Մեղադրանքը առաջադրվել է, բովանդակությունը և մանրամասները չեմ կարող ասել, որովհետև արդեն իսկ նախազգուշացվել է նախաքննական գաղտնիքը չբացահայտելու մասին: Ամեն դեպքում՝ այս պահին ամենակարևոր բանը դա երեխաների ազատությունն է: Տղաները ընդամենը պատարագի են մասնակցել, մեղադրանքը այն է, ինչի շուրջ որ կասկածանքն է եղել: Քաղաքական ենթատեքստ տալու փորձ կատարվեց, բայց երեխաները ապաքաղաքական են, 12-րդ դասարանի տղաներ են ու չէին էլ կարող քաղաքական գործունեությամբ զբաղվել»,- նշել է նա: Միքայել Մինասյանը լրագրողներին ասաց, որ լավ է, իր հանդեպ լավ են վերաբերվել, բայց խնդրեց այլ հարցեր չտալ։ Հանրային գործիչ Գևորգ Գևորգյանի նկատմամբ որպես խափանման միջոց կիրառվել է բացակայելու արգելքը և 5 մլն դրամ գրավը: Հիշեցնենք, որ այսօր ՔԿ-ից հայտնել են, որ տեղի ունեցած միջադեպի քրվարույթով 3 անձի նկատմամբ հարուցվել է հանրային քրեական հետապնդում: