Գաբալա քաղաքում «Խաղաղության կամուրջ» նախաձեռնության շրջանակներում տեղի է ունեցել Ադրբեջանի նախագահի օգնական, նախագահի աշխատակազմի արտաքին քաղաքականության հարցերի բաժնի վարիչ Հիքմեթ Հաջիևի հանդիպումը Ադրբեջանի և Հայաստանի քաղաքացիական հասարակությունների ներկայացուցիչների հետ, որն անցկացվել է երկկողմ կլոր սեղանի ձևաչափով։ Այս մասին հայտնում են ադրբեջանական ԶԼՄ-ները։ Հանդիպման ընթացքում Հիքմեթ Հաջիևը մտքեր է փոխանակել մասնակիցների հետ, ինչպես նաև պատասխանել հայկական պատվիրակության հարցերին։ Նաև կրկին նշվել է, որ երկիրը հավատարիմ է Վաշինգտոնում համաձայնեցված Հայաստանի և Ադրբեջանի միջև խաղաղության օրակարգին, ինչպես նաև Վաշինգտոնի գագաթնաժողովի ոգուն։ Բացի այդ, հայտարարվել է երկու երկրների միջև առևտրային հարաբերությունների ձևավորման և Ադրբեջանից Հայաստան ապրանքների տարանցիկ անցման ապահովման մասին։ Նշվել է, որ TRIPP նախագծի իրականացումը կնպաստի տարածաշրջանում մթնոլորտի և ողջ տրանսպորտային պատկերի փոփոխությանը։ Հաջիևն ընդգծել է, որ Ադրբեջանի և Հայաստանի միջև խաղաղության օրակարգի շուրջ բանակցությունները կրում են երկկողմ բնույթ, և նույնքան կարևոր է, որ քաղաքացիական հասարակությունների միջև նմանատիպ փոխանակումները և վստահության ամրապնդման միջոցառումները նույնպես լինեն երկկողմ։ Նախագահի օգնականը նշել է, որ նոր գլոբալ ցնցումների և պատերազմների ֆոնին Հարավային Կովկասում խաղաղության և անվտանգության ապահովումն ունի առանձնահատուկ կարևորություն։