Այսօր Ռուսաստանից Ադրբեջանի տարածքով դեպի Հայաստան կուղարկվի երկու վագոն պարարտանյութ և երկու վագոն ցորեն։ Այս մասին հայտնում են ադրբեջանական ԶԼՄ-ները: Գնացքը կմեկնի ժամը 14:00-ին «Ադրբեջանական երկաթուղիներ» ՓԲԸ-ի «Բելաջարի» կայարանից։ Այնուհետև գնացքը «Բյոյուկ-Կյասիկ» կայարանով կուղևորվի Վրաստան, որտեղից էլ կուղղվի դեպի Հայաստան։ Ավելի վաղ Ադրբեջանի տարանցմամբ ՌԴ-ից Հայաստան էր ուղարկվել ավելի քան 28 հազար տոննա ցորեն, ավելի քան 4 հազար տոննա պարարտանյութ, 133 տոննա ալյումին և 68 տոննա հնդկացորեն։ Բացի այդ, Ադրբեջանից Հայաստան են արտահանվում նավթամթերքներ։ Այսօրվա դրությամբ Հայաստան է մատակարարվել ավելի քան 10 հազար տոննա դիզելային վառելիք, 979 տոննա ԱԻ-92 ապրանքանիշի բենզին և 2955 տոննա ԱԻ-95 ապրանքանիշի բենզին։