Այսօր՝ սեպտեմբերի 30-ին, արտակարգ դեպք է տեղի ունեցել Երևանում: Ժամը 11:20-ի սահմաններում ՀՀ ներքին գործերի նախարարության ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկները Ագաթանգեղոս-Խորենացի փողոցների խաչմերուկում ծառայություն կատարելիս են լինում, երբ նկատում են, որ մի քաղաքացի այրվածքներով կանգնած է Խորենացի 28/4 հասցեի մոտ: Shamshyan.com-ի տեղեկություններով, պարեկները շտապ մոտենում են նշված վայր, իսկ այդ ընթացքում գումարտակի հրամանատար Գոռ Առաքելյանը զանգում է շտապօգնություն և օպերատիվորեն ժամանած շտապօգնոթյան բժիշկները այդ քաղաքացուն, ում հագուստը, կարելի է ասել, այրված էր, իսկ մարմնի տարբեր հատվածներում էլ կային այրվածքի հետքեր, բժիշկների կողմից տեղում առաջին բուժօգնությունն է ստանում, ապա նրան տեղափոխում են Այրվածքաբանության ազգային կենտրոն: Պարզվում է, որ հիվանդանոց տեղափոխված քաղաքացին պերֆերատորով ասֆալտի քանդման աշխատանքներ կատարելիս է եղել, երբ անզգուշաբար դիպել է նշված վայրով անցնող հոսանքի լարին, ինչից պայթյուն և հրդեհ է առաջացել, և նա ստացել է այրվածքներ: Տեղում ոստիկաններն ու պարեկները պարզել են, որ հիվանդանոց տեղափոխված քաղաքացին Գեղարքունիքի մարզի բնակիչ, 28–ամյա Վաչիկ Ա.-ն է: