Հացադուլի մեջ գտնվող Նարեկ Սամսոնյանն առողջական շատ լուրջ խնդիր ունի,- տեղեկացրել է փաստաբան Ռուբեն Մելիքյանը: Նա նշել է, որ քիչ առաջ «Արմավիր» ՔԿՀ-ում էր, զրուցել է Նարեկ Սամսոնյանի և ՔԿՀ բժշկություն ՊՈԱԿ-ի համապատասխան ստորաբաժանման մասնագետների հետ, որից տեղեկացել է, որ Սամսոնյանի առողջական վիճակն իսկապես լուրջ է: «Մինչև հունվարի 9-ի դատական նիստը, դեռևս հունվարի 5-ին, ես խնդիրը նկարագրող գրություն եմ մուտք արել ՔԿՀ բժշկության ՊՈԱԿ, իրենք էլ շատ արագ զբաղվել են: Այսինքն՝ մենք մինչև դատրանի որոշումն ենք խնդիրի մասին բարձրաձայնել ոչ թե հիմա»,- նշել է նա։ Փաստաբանն ասել է, որ սրա մասին չէր բարձրաձայնել մինչ այս պահը, քանի որ նախ Նարեկ Սամսոնյանն է դեմ եղել, հետո չեն ցանկացել, որ տպավորություն լինի, թե շահարկում են թեման: Նարեկ Սամսոնյանն իր գործով դատական նիստի ժամանակ անժամկետ հացադուլ էր հայտարարել: Այսօր հացադուլի ութերորդ օրն է: